Festivali i 8-të i Fabrikës së Xhazit nisi në Teatrin Kombëtar të Manastirit, duke shënuar një tjetër edicion të këtij eventi të rëndësishëm për skenën e xhazit në Maqedoninë e Veriut. Pianisti francez Laurant Coulondre hapi festivalin me një performancë të veçantë.

Festivali, i cili do të zgjasë nga 16 deri më 19 prill, është pritur me entuziazëm nga dashamirët e xhazit. Sipas drejtorit dhe themeluesit të festivalit, Profesor Sasho Popovski, organizimi i një eventi të tillë paraqet sfida të vazhdueshme, por ai shprehu vendosmërinë për të vazhduar. Ai theksoi rëndësinë e mbështetjes së artit dhe faktin që Festivali i Xhazit është njohur nga një asociacion botëror në Shangai, Kinë, duke e bërë atë të vetmin festival nga Maqedonia e Veriut me këtë vlerësim.

Pianisti francez, Laurant Coulondre, i njohur për qasjen e tij inovative ndaj muzikës, ka marrë disa çmime prestigjioze dhe ka bashkëpunuar me emra të njohur të xhazit. Pas performancës së tij, ai shprehu kënaqësinë për energjinë e shkëmbyer me publikun.

Në mbrëmje performoi edhe Corey Wilcox dhe WORKING CLASS HEROES (Shtetet e Bashkuara të Amerikës). Wilcox është një multi-instrumentist me aftësi të jashtëzakonshme teknike dhe shkathtësi muzikore.

Festivali mbahet nën patronazhin e Komunës së Manastirit dhe në partneritet me Teatrin Kombëtar të Manastirit, me mbështetjen e Ministrisë së Kulturës dhe Qendrës Kulturore të Manastirit, si dhe Institutit Francez nga Shkupi, Ambasadës së Spanjës dhe Delegacionit të Bashkimit Evropian. Në ceremoninë e hapjes morën pjesë Kryetari i Komunës së Manastirit, Toni Konjanovski, Ambasadori i Francës, Konsulli grek, Konsulli Nderi i Francës në Manastir, Kaliopa Krivashija Stilinović, Drejtori i Institutit Francez, mysafirë nga qytete të tjera dhe dashamirës të xhazit.

Dita e dytë e festivalit do të përfshijë një workshop në bashkëpunim me Shoqatën Pelagonia, JAZZ FACTORY FOR KIDS, promovimin e librit “Press and Play” të Nenad Georgievski, dhe një workshop të saksofonistes me famë botërore Swantje Lampert nga Austria. Programi koncertor do të fillojë me performancën e Trios së pianistit Jaume Miquel nga Mbretëria e Spanjës, pasuar nga performanca e saksofonistes dhe kompozitores Swantje Lampert dhe në fund performanca e kuartetit të Jovan Cvetkovic nga Maqedonia në Pub Bourbon Street Manastir.