Në Shkup, një regjim i veçantë trafiku do të hyjë në fuqi nesër, më 19 Prill 2025, për shkak të festës fetare të Pashkëve. Njësia e Sigurisë Rrugore pranë SPB Shkup do të zbatojë masa të veçanta në qendër të qytetit, si dhe në komunat Gjorçe Petrov dhe Aerodrom.

Në qendër të Shkupit, nga ora 18:00 deri në përfundim të aktiviteteve festive, do të ketë mbyllje të përkohshme të rrugëve nëse është e nevojshme.

Bulevardi “Partizanski Odredi” nga kryqëzimi me rrugën “Franklin Ruzvelt” deri te kryqëzimi me bulevardin “VMRO” mund të mbyllet. Po ashtu, bulevardi “Shën Kliment Ohridski” nga kryqëzimi me bulevardin “Ilinden” deri te kryqëzimi me rrugën “Dimitrie Çupovski” dhe rruga “Mitropolit Teodosij Gologanov” nga kryqëzimi me rrugën “9 Maji” deri te rrethrrotullimi me rrugën “Shën Kirili dhe Metodi” mund të jenë të mbyllura.

Autobusët që kalojnë mbi urën “Goce Delçev” do të devijohen sipas nevojës nëpër bulevardin “Ilinden” dhe nëpërmjet rrugës “Franklin Ruzvelt” për t’u bashkuar me bulevardin “Partizanski Odredi”. Autobusët që kalojnë nëpër qendër do të kalojnë nëpër rrugën “M.T. Gologanov” dhe nëpërmjet rrugës “Franklin Ruzvelt” për t’u bashkuar me bulevardin “Partizanski Odredi”. E njëjta rrugë do të përdoret edhe në drejtim të kundërt.

Në komunën Gjorçe Petrov, nëse është e nevojshme, rruga “Ushtria Maqedonase” përpara kishës “Shën Petër dhe Pal” në seksionin nga kryqëzimi me bulevardin “Partizanski Odredi” deri në rrugën “Gjorçe Petrov” do të mbyllet.

Në komunën Aerodrom, rruga lokale për në fshatin Lisiçe mund të mbyllet përkohësisht nëse e kërkojnë rrethanat.

Policia paralajmëron se edhe rrugë të tjera pranë objekteve fetare mund të mbyllen sipas nevojës.

Ministria e Punëve të Brendshme apelon tek qytetarët që të respektojnë urdhrat e oficerëve të policisë.