Shoqata Ekologjike e Maqedonisë, në bashkëpunim me Ndërmarrjen Publike “Pyjet Kombëtare” – Dega Shar-Gostivar, ka nisur ripyllëzimin e zonës së Bukovikut, një ekosistem natyror i rëndësishëm dhe një biokorridor kyç për rrëqebullin e Ballkanit.

Në kuadër të projektit “Iniciativa e Pyjeve Veriore”, po mbillen 21,000 fidanë ahu (Fagus sylvatica). Ky projekt zbatohet në bashkëpunim me partnerët PPNEA nga Shqipëria dhe Zyrën Rajonale të IUCN për Evropën Lindore dhe Azinë Qendrore, me mbështetjen e plotë të Fondacionit Suedez të Kodit Postar.

Sipas autoriteteve, aksioni i pyllëzimit është në zhvillim të plotë. Kjo lloj specie është autoktone e rajonit dhe lloji më i zakonshëm. Rajoni mban emrin Bukovik për shkak të këtij lloji.

Ky aksion jo vetëm që restauron mbulesën pyjore, por gjithashtu kontribuon në mbrojtjen e një prej habitateve të fundit natyrore të rrëqebullit të rrezikuar të Ballkanit. Zona e Bukovikut është pjesë e një korridori biologjik të rëndësishëm, i cili mundëson lëvizjen dhe mbijetesën e kësaj maceje të rrallë të egër.

Sara Krstevska, asistente projekti në Shoqatën Ekologjike të Maqedonisë, theksoi se pas dy vitesh kërkime dhe analiza në terren, janë arritur të fillojnë aktivitetet për restaurimin e Bukovikut. Ajo theksoi rëndësinë e Bukovikut si biokorridor për kafshët e mëdha. Krstevska shprehu krenarinë për bashkëpunimin me sektorin e pylltarisë për të mbrojtur habitatet e rrëqebullit të Ballkanit dhe për të kontribuar në qëndrueshmërinë e ekosistemeve pyjore. Ajo falënderoi Ndërmarrjen Publike “Pyjet Kombëtare”, dega “Shar” – Gostivar, për kontributin e madh në realizimin e aktiviteteve.

Shoqata Ekologjike e Maqedonisë thekson se me restaurimin e pyjeve, restaurohet edhe jeta. Ripyllëzimi i Bukovikut është një investim afatgjatë në natyrë, por edhe në të ardhmen e rajonit.