Lëvizja ZNAM ka reaguar fuqishëm ndaj akuzave të fundit lidhur me pronën e kryetarit të Komunës së Kumanovës, Maksim Dimitrievski, duke i cilësuar ato si të pabaza dhe të ricikluara nga e kaluara. Sipas lëvizjes, këto akuza janë të ngjashme me ato të bëra gjatë zgjedhjeve lokale të vitit 2021 nga kandidati i LSDM-së, Oliver Ilievski, dhe ish-deputetja e LSDM-së, Lidija Trajkovska.

ZNAM thekson se Ilievski dhe Trajkovska u dënuan me vendim të formës së prerë, kërkuan falje dhe paguan dëmshpërblim. Lëvizja paralajmëron se e njëjta gjë do të ndodhë edhe me Murgashanska-n, e cila ka ngritur akuzat aktuale.

Sipas ZNAM, toka në fjalë është blerë me kontratë blerjeje nga një person fizik në vitin 2010, kur Dimitrievski nuk ishte kryetar komune. Lëvizja siguron se kjo pronë është deklaruar në mënyrë korrekte në deklaratën e tij të pasurisë, sikurse edhe të gjitha pronat e tjera.

ZNAM shpjegon se toka ndodhet në një zonë ku plani urbanistik dhe qëllimi i tokës janë ndryshuar, duke rritur vlerën e saj. Megjithatë, pronarët paguajnë rregullisht tatimin mbi shitjen me vlerën reale të tregut.

Lëvizja shton se kjo tokë ka qenë subjekt i një shkëmbimi për një pronë tjetër – një apartament i blerë me kontratë dhe i paguar me transaksion bankar, me të gjitha detyrimet e paguara. ZNAM thekson se komuna, dhe aq më pak kryetari, nuk lëshon leje banimi për një ndërtesë, por kjo është përgjegjësi e mbikëqyrjes teknike të ndërtesës me raportin përfundimtar të ndërtimit, i cili kryhet në kadastër.