Opozita e LSDM-së ka ngritur shqetësime serioze rreth marrëveshjes së fundit prej 6 miliardë eurosh të nënshkruar nga qeveria, duke kërkuar transparencë të plotë dhe duke vënë në pikëpyetje qëllimin e vërtetë të kësaj marrëveshjeje.

LSDM-ja thekson se, pavarësisht deklaratave publike dhe fotove të shpërndara, publiku nuk ka marrë asnjë informacion konkret lidhur me aspektet kyçe të marrëveshjes. Ata shprehin shqetësimin se diskursi publik është i mbushur me frazë të përgjithshme për “momente historike” dhe “investime madhore”, por pa detaje thelbësore.

Partia opozitare ka vënë në dyshim sjelljen e Kryeministrit Mickoski, duke u referuar në një intervistë të tij për Sky News, për të cilën qeveria nuk ka njoftuar. LSDM-ja thekson se Mickoski ka shmangur përgjigjen në pyetjen nëse do të diskutonte me Kryeministrin britanik pranimin e migrantëve në Maqedoni, si pjesë e marrëveshjes strategjike.

LSDM-ja ngre pyetjen thelbësore nëse huaja prej 6 miliardë eurosh është e destinuar vetëm për infrastrukturë, apo nëse ajo fsheh një marrëveshje më të gjerë. Ata theksojnë se, bazuar në informacione nga media britanike dhe deklarata të zyrtarëve britanikë, marrëveshja në fushën e migrimit nënkupton “bashkëpunim të gjerë”.

Opozita kërkon përgjigje të qarta dhe të hapura nga qeveria lidhur me gatishmërinë e Maqedonisë për t’u bërë një zonë për akomodimin e migrantëve në të ardhmen. Ata pyesin nëse marrëveshja aktuale lë hapësirë për diskutime të tilla dhe kërkojnë konfirmim të prerë se Maqedonia nuk do të diskutojë një angazhim të tillë politik as tani, as në të ardhmen.