Qeveria e Maqedonisë së Veriut ka autorizuar Zëvendëskryeministrin dhe Ministrin e Transportit që të shkojë në Londër këtë javë për të nënshkruar marrëveshjen strategjike me Mbretërinë e Bashkuar. Marrëveshja, e cila pritet të nënshkruhet të mërkurën ose të enjten, do të shënojë fillimin e realizimit të pjesës ekonomike të partneritetit strategjik mes dy vendeve.

Kryeministri Hristijan Mickoski deklaroi se përmes kësaj marrëveshjeje, Maqedonia e Veriut do të ketë në dispozicion 5 miliardë stërlina, ose rreth 6 miliardë euro, për projekte strategjike që do të transformojnë vendin.

Një nga projektet kryesore që do të financohen me këto mjete është modernizimi, rikonstruksioni dhe ndërtimi i një linje të dytë hekurudhore përgjatë Korridorit 10, që lidh Tabanovcen me Gjevgjelinë. Sipas Mickoskit, ky projekt do të mundësojë që transporti i mallrave të zhvillohet me një shpejtësi mesatare prej mbi 110 kilometrash në orë, ndërsa transporti i udhëtarëve me rreth 160 kilometra në orë. Ai theksoi se aktualisht, trenat e mallrave lëvizin me shpejtësi shumë të ulët, në disa pjesë edhe me 5-10 kilometra në orë, me një mesatare prej 25 kilometrash në orë.

Përveç modernizimit të hekurudhës, marrëveshja strategjike do të mundësojë edhe përfundimin e projektit për Qendrën Klinike në Shtip, e cila do t’i ofrojë kësaj pjese të vendit kujdes shëndetësor modern dhe të avancuar, duke përfshirë një Fakultet Mjekësie dhe një konvikt studentor me dyqind shtretër. Gjithashtu, do të ndërtohet edhe spitali në Kërçovë dhe do të realizohet rekonstruimi i plotë i Spitalit Klinik në Tetovë.

Mickoski theksoi se këto janë vetëm fillimi dhe se do të ketë projekte të tjera në fushën e energjisë, transportit dhe shëndetësisë, të cilat do të jenë investime kapitale. Ai kritikoi komentet e opozitës, e cila sipas tij, po kritikon huazimet për investime kapitale, duke theksuar se Maqedonia e Veriut ka nevojë për një opozitë cilësore dhe konstruktive.