Qendra ditore “Foleja” për fëmijë dhe familje në rrezik social është hapur sot nga organizata civile Gazetarët për të Drejtat e Njeriut. Qendra, e vendosur në Shkup, ofron një hapësirë të sigurt dhe mbështetëse për kategoritë më të cenueshme të qytetarëve.

Qendra “Foleja” ofron ndihmë psiko-sociale, edukim jo-formal, këshillim ligjor dhe kujdes ditor. Theksi i veçantë i qendrës është tek fëmijët dhe të rinjtë.

Sekretari Shtetëror në Ministrinë e Politikës Sociale, Demografisë dhe Rinisë, Fatmir Sabriu, theksoi se qendra është simbol i solidaritetit, humanizmit dhe kujdesit për çdo fëmijë dhe familje. Ai shtoi se ministria ka përkushtim të ndërtojë një rrjet sigurie dhe mundësish për fëmijët.

Drejtori në detyrë i Qendrës Ndërkomunale për Çështje Sociale të Qytetit të Shkupit, Hamza Ameti, tha se krijimi i hapësirave të tilla është thelbësor, duke shtuar se “Foleja” është një komunitet ku çdo fëmijë do të ndihet i sigurt, i pranuar dhe i dashur.

Qendra “Foleja” u themelua me mbështetjen e Ministrisë Federale të Punës, Çështjeve Sociale, Shëndetësisë, Kujdesit dhe Mbrojtjes së Konsumatorit të Austrisë, dhe në bashkëpunim me OJQ ECPAT Austri. Ky është qendra e parë e këtij lloji në Maqedoninë e Veriut.

Andrea Nakova nga Gazetarët për të Drejtat e Njeriut, koordinatore e projektit, shpjegoi se “Foleja” do të ketë një kopsht ditor për 16 fëmijë parashkollorë, dy grupe mentoruese për 28 nxënës të shkollës fillore dhe mbështetje psiko-sociale për të rinjtë dhe familjet. Ekipi i ekspertëve përbëhet nga një punëtor social, një psikolog dhe një edukator special.