Shkup – VMRO-DPMNE akuzon LSDM-në dhe Venko Filipçen për heshtje dhe fshehje lidhur me origjinën e vizës së artë të ish-ministrit të Shëndetësisë. Valentin Manasievski, anëtar i Komitetit Qendror të VMRO-DPMNE, në një konferencë për shtyp deklaroi se Filipçe është larguar nga vendi para 6 ditësh nëpërmjet pikës kufitare të Bogorodica.

Manasievski pyeti nëse Filipçe është nisur drejt aeroportit të Selanikut dhe ka fluturuar drejt Dubait me vizën e artë për t’u takuar me mentorin e tij, Zoran Zaev, për të parë nga afër aktivitetet e ndërtimit të ndërtesës 50-katëshe.

“Venko Filipçe, duke qenë se nuk e mohon, lind teoria se pretendimet tona janë të vërteta. Venko Filipçe i ka borxh një përgjigje publikut, nëse ai dhe Zaev vërtet kanë një biznes në Dubai, nga kanë ardhur paratë? A i ka fituar Venko paratë ilegalisht, sepse një shumë prej 500 mijë dollarë nuk fitohet kaq lehtë? Filipçe nuk e ka treguar diplomën e tij të nostrifikuar, sepse duket se nuk e ka, as nuk është përgjigjur se me cilin spital ka negociuar për të marrë një vizë të artë?,” tha Manasievski.

Sipas tij, LSDM dhe Filipçe po fundosen në humnerë, duke shtuar se pandershmëria, manipulimi dhe korrupsioni janë themelet mbi të cilat identifikohen LSDM dhe Filipçe. Ai vlerësoi se LSDM dhe Filipçe janë histori e lexuar dhe sinonim i paaftësisë, krimit dhe korrupsionit.