Zv/Kryeministri i Parë dhe Ministri i Mjedisit dhe Planifikimit Hapësinor, Izet Mexhiti, theksoi rëndësinë e ndërtimit të infrastrukturës së qëndrueshme, duke e konsideruar atë si një domosdoshmëri dhe jo si një zgjedhje, gjatë pjesëmarrjes në konferencën “Promovimi i Infrastrukturës së Gjelbër në Ballkanin Perëndimor”.

Ministri Mexhiti vuri në dukje se infrastruktura e gjelbër paraqet një sfidë globale, e cila kërkon veprim kolektiv, vizion dhe bashkëpunim.

Ai theksoi se mënyra se si ne i formësojmë projektet e infrastrukturës ndikon drejtpërdrejt në cilësinë e jetës, stabilitetin ekonomik, mbrojtjen e mjedisit dhe qëndrueshmërinë e komuniteteve tona ndaj ndryshimeve klimatike. Investimet strategjike në infrastrukturë, të cilat marrin parasysh rreziqet klimatike dhe aspektet e biodiversitetit, përbëjnë një mjet të fuqishëm për të përshpejtuar zhvillimin ekonomik, krijimin e vendeve të reja të gjelbra të punës, nxitjen e inovacionit dhe përmbushjen e qëllimeve të zhvillimit të qëndrueshëm deri në vitin 2030.

Mexhiti gjithashtu theksoi rëndësinë e integrimit të aspekteve klimatike dhe mjedisore në procesin e planifikimit dhe vlerësimit të ndikimit mjedisor. Ai shtoi se kjo mundëson vendime të informuara dhe afatgjata të qëndrueshme.

Sipas tij, infrastruktura që është rezistente ndaj goditjeve klimatike jo vetëm që mbron buxhetin dhe burimet publike, por gjithashtu kontribuon në stabilitet dhe siguri për brezat e ardhshëm.

Hapat që duhet të ndërmerren përfshijnë ndërtimin dhe përshtatjen e sistemeve të menaxhimit të rrezikut që do të na përgatisin për sfidat klimatike, transformimin e sektorit të energjisë drejt burimeve të rinovueshme, modernizimin e bujqësisë përmes sistemeve efikase të ujitjes dhe praktikave të zgjuara klimatike, dhe përmirësimin e efikasitetit të energjisë dhe rezistencës sizmike të ndërtesave.

Në konferencë mori pjesë edhe Ministrja e Energjisë, Minierave dhe Burimeve Minerare, Sanja Bozhinovska.