Manastir, Maqedoni e Veriut – Një 16-vjeçar nga fshati Bistricë, afër Manastirit, u arrestua nga policia nën akuzën e shantazhit ndaj një 34-vjeçari nga Manastiri.

Sipas policisë, i mituri kishte siguruar foto eksplicite të viktimës duke u paraqitur si një femër e rreme në komunikimin online. Më pas, ai kërcënoi se do t’i publikonte fotot nëse nuk merrte para nga 34-vjeçari.

I riu u ndalua në stacionin policor të Manastirit, ku edhe iu gjetën paratë që kishte marrë nga viktima.

Policia po punon për dokumentimin e plotë të rastit, pas së cilës do të ndërmerren masat e nevojshme ligjore.