Dragan Kovaçki, deputet dhe anëtar i KE të VMRO-DPMNE, ka kërkuar publikisht nga Taravari të shpjegojë arsyet e ndryshimit të qëndrimit të tij ndaj BDI-së dhe LSDM-së, duke e pyetur se me çfarë po e shantazhojnë. Kovaçki theksoi se Taravari kishte ardhur në pushtet me premtimin se do ta dërgonte BDI-në në opozitë, duke shtruar pyetjen se çfarë ka ndodhur që brenda 10 muajsh ai është rikthyer në krahët e tyre.

Sipas Kovaçkit, sjellja e paarsyeshme e Taravarit mund të jetë rezultat i shantazhit dhe diktatit nga dyshja kriminale LSDM dhe BDI. Ai theksoi se qytetarët meritojnë të dinë të vërtetën.

Kovaçki vuri në dukje se Taravari nuk është dëgjuar asnjëherë të flasë për ngecjen e integrimeve në BE, e cila ndodhi falë partnerëve të tij të rinj-të vjetër, LSDM dhe BDI. Gjithashtu, ai tha se Taravari nuk është dëgjuar të ankohet se çështjet shqiptare nuk trajtohen mirë, sepse vetë ai ka deklaruar shumë herë se Qeveria kujdeset mirë për shqiptarët.

Kovaçki shtoi se Taravari duhet të përgjigjet publikisht se me çfarë po e shantazhojnë LSDM dhe BDI, pavarësisht se deklaratat e tij nuk kanë lidhje me realitetin. Ai pyeti nëse kjo ka lidhje me ndonjë biznes apo ndonjë motiv tjetër.

Kovaçki theksoi se Taravari ka dëshmuar se nuk është njeri i qëndrueshëm dhe se ai duhet t’u tregojë qartë qytetarëve se si ka mundësi që BDI, brenda 10 muajsh, nga një parti kriminale dhe e korruptuar, është bërë opsioni i duhur dhe i vërtetë për të.