Qeveria e vendit ka miratuar fondet e nevojshme për blerjen e insulinës, glukagonit, gjilpërave të insulinës dhe shiritave testues të sheqerit në gjak, pompave të insulinës me harxhuese dhe sensorëve për monitorimin e vazhdueshëm të glukozës, për periudhën prill 2025 – prill 2027. Vendimi u mor në seancën e 73-të të rregullt të qeverisë.

Për këtë qëllim, do të shpenzohen 2,319,311,828.00 denarë, duke përfshirë TVSH-në. Nga kjo shumë, 1,854,864,916.00 denarë duke përfshirë TVSH-në janë fonde të nevojshme për terapinë e insulinës dhe 464,446,912.00 denarë duke përfshirë TVSH-në janë fonde të nevojshme për gjilpërat e insulinës dhe shiritat testues të sheqerit në gjak, pompat e insulinës me harxhuese dhe sensorët për monitorimin e vazhdueshëm të glukozës.

Sipas njoftimit të qeverisë, fondet janë planifikuar të paguhen nga Programi për sigurimin e insulinës, glukagonit, gjilpërave të insulinës dhe shiritave testues të sheqerit në gjak, pompave të insulinës me harxhuese dhe sensorëve për monitorimin e vazhdueshëm të glukozës me një dinamikë pagese të përcaktuar saktë. Qeveria thekson se mbetet e përkushtuar në promovimin dhe kujdesin për shëndetin e të gjithë qytetarëve.