Kryeministri dhe ekipi negociator në koalicion do të vendosin se kush do të jetë Ministri i ri i Shëndetësisë, duke zëvendësuar Arben Taravarin, i cili u largua nga Qeveria, deklaroi sot Ministrja e Arsimit Vesna Janevska.

Janevska shtoi se ajo mori vesh nga mediat për përmendjen e emrit të saj në llogaritjet për shpërndarjen e portofoleve në koalicionin qeveritar, pas deklaratës së Bilal Kasamit, i cili tha dje se “VLEN” do të marrë portofolin e arsimit dhe VMRO-DPMNE portofolin e shëndetësisë.

Ajo theksoi se aktualisht është e fokusuar në përfundimin e punëve të saj si Ministre e Arsimit dhe Shkencës. “Kam shumë punë për të përfunduar për të gjithë mandatin,” u shpreh Janevska, duke marrë pjesë në panelin e diskutimit mbi temën “Edukimi i së Ardhmes: Ndërtimi i Liderëve, Mendimtarëve dhe Inovatorëve” në Samitin e 14-të të Maqedonisë 2025.

E pyetur nëse do ta pranonte nëse do t’i ofronin postin në Shëndetësi, ajo nuk dha një përgjigje specifike, duke theksuar se “Është shumë herët për të menduar për një gjë të tillë.”

Ndërkohë, udhëheqja e lartë e Aleancës për Shqiptarët, lider i së cilës është Arben Taravari, vendosi zyrtarisht mbrëmë që partia të kalojë në opozitë. Përveç Taravarit, edhe Zëvendëskryeministri i ngarkuar për qeverisje të mirë, Arben Fetai, është nga Aleanca për Shqiptarët në këtë përbërje qeveritare.