Aleanca për Shqiptarët (ASH), e udhëhequr nga Arben Taravari, është larguar zyrtarisht nga qeveria e kryeministrit Hristijan Mickoski, duke shënuar një goditje të rëndë për stabilitetin e koalicionit qeverisës. Vendimi u mor pas vlerësimeve kritike ndaj performancës së qeverisë dhe zhgënjimit të thellë të qytetarëve.

Arben Taravari, figura kyçe në politikën shqiptare dhe kandidat në zgjedhjet e fundit presidenciale, theksoi se qëllimi i largimit është rikthimi pranë popullit, duke argumentuar se qeveria aktuale ka dështuar të përmbushë premtimet e saj elektorale.

Sipas ish-zv/ministrit të Punëve të Jashtme, Andrej Zhernovski, largimi i Aleancës për Shqiptarët është tregues i mosrealizimit të rezultateve nga qeveria e Mickoskit. Ai thekson se qeveria ka alienuar qytetarët, duke shkelur premtimet e dhëna dhe duke shkaktuar zhgënjim të thellë.

Zhernovski kritikon situatën ekonomike, me rritje të pakontrolluar të çmimeve të produkteve bazë dhe mungesë të masave për stabilizimin e tyre. Ai thekson gjithashtu klimën e rënduar të biznesit, me vonesa në kthimin e TVSH-së dhe mospagesë të obligimeve ndaj ekonomisë.

Më tej, ai vlerëson se politika e jashtme është e çorientuar dhe se vendi është izoluar ndërkombëtarisht. Ai thekson se aferat e ministrave dhe drejtorëve aktualë, si dhe shembujt e shumtë të nepotizmit, janë të panumërt dhe të padenjueshëm.

Zhernovski parashikon kalimin e deputetëve të VLEN-it në anën tjetër, ndarjen e grupit parlamentar ZNAM dhe zgjedhje të parakohshme parlamentare, që mund të mbahen së bashku me zgjedhjet lokale, por më shumë gjasa në pranverë. Ai konkludon se shumica e madhe parlamentare e qeverisë ka filluar të zvogëlohet, duke sjellë paqëndrueshmëri në funksionimin e saj.