Komuna e Qendrës ka shpallur një thirrje publike për realizimin e projektit “Thikë dhe Pirun në Pjatë Evropiane,” si pjesë e Programit Vjetor Kulturor të komunës, me rastin e Ditës Ndërkombëtare të Familjes, më 15 maj.

Qëllimi i projektit është prezantimi i produkteve karakteristike nga ushqimi tradicional maqedonas dhe evropian. Sipas Komunës, ky event synon të lidhë kultura të ndryshme dhe të njihet me kuzhinat gastronomike evropiane.

Kryetari i Komunës së Qendrës, Goran Gerasimovski, ka ftuar të gjitha palët e interesuara të aplikojnë për organizimin e këtij evenimenti tashmë tradicional në Parkun e Frankofonisë. Ai theksoi se ky event është një mundësi për të nxitur bashkëpunimin ndërkombëtar.

Kanë të drejtë të marrin pjesë të gjitha shoqatat, organizatat dhe personat juridikë të regjistruar me seli në territorin e Komunës së Qendrës, të cilët kanë përvojë në fushën e kulturës, turizmit dhe marketingut.

Për aplikim, është e nevojshme të dorëzohet: një përshkrim i konceptit, agjenda, portofoli i punëve të mëparshme, konstruksioni financiar dhe dokumente relevante (gjendja aktuale, dëshmi e përvojës dhe llogaria aktive).

Pjesëmarrësit duhet të ofrojnë një program dy-orësh me aktivitete që synojnë promovimin e bashkëpunimit ndërkombëtar, promovimin e prodhuesve lokalë dhe animimin e të gjitha grupmoshave. Organizatori i përzgjedhur do të marrë mbështetje financiare në vlerë deri në 300,000 denarë. Afati i fundit për aplikime është pesë ditë pune nga data e publikimit në faqen e internetit të Komunës.