Shkup – Opera “Nabuko”, kryevepra e fuqishme e Xhuzepe Verdit, do të interpretohet në skenën e Operas dhe Baletit Kombëtar më 19 maj, në kuadër të edicionit të 53-të të festivalit “Mbrëmjet Operistike të Majit”.

Dirigjent i operës do të jetë Miron Michailidis nga Greqia, regjisor Renato Bonajuto nga Italia, kurse skenografia dhe kostumet janë dizajnuar nga Flavio Arbeti dhe Artemio Cabassi po ashtu nga Italia. Koreografinë e ka realizuar Maja Mitrovska-Bogojevska, koncertmaestër Jane Bakevski, dirigjente e korit Jasmina Gjordjeska dhe dizajner i ndriçimit Milço Aleksandrov.

Në rolin titullar (Nabuko) do të interpretojë Luis Cansino nga Spanja, rolin e Abigaelës do ta luajë Hanying Tso nga Kina, Nikolina Janevska do të jetë në rolin e Fenena, Ugo Tarquini nga Italia do të interpretojë si Ismaele dhe Giovanni Parodi gjithashtu nga Italia, do të jetë Zaccaria. Në rolet e tjera do të interpretojnë Dime Petrov, Ana Rojdeva, Dejan Stoev, kori, orkestra, ansambli i baletit të Operas dhe Baletit Kombëtar, si dhe nxënës nga DMBUC “Ilija Nikolovski – Luj”.

“Nabuko” është një operë liriko-dramatike në katër akte, një nga veprat më të njohura të Xhuzepe Verdit dhe e preferuar nga publiku. Kjo operë u shfaq premierë në vitin 1842 në La Scala në Milano. Është opera e tretë e Verdit, e cila konsiderohet se e ka vendosur përfundimisht reputacionin e tij si kompozitor. Tema e operës është historia e vështirë e popullit hebre, i sulmuar dhe i mundur, i dëbuar nga atdheu i tij, megjithëse ngjarjet historike përdoren vetëm si sfond për komplotin romantik dhe politik. Verdi e shkroi arien e famshme korale e cila u bë shtylla dramatike dhe muzikore e veprës “Va, pensiero, sull’ali dorate” (“Fluturo, mendim, mbi krahët e artë”) brenda një nate.