Partia Levica pritet të dorëzojë këtë javë një projektligj për formimin e një inspektoriati që do të mbikëqyrë përdorimin e stemës, flamurit dhe himnit të shtetit, si dhe flamujve të komuniteteve në vend.

Sipas Levica-s, ky hap vjen si përgjigje ndaj mosrespektimit të vazhdueshëm të simboleve shtetërore, veçanërisht gjatë festimeve publike, ngjarjeve sportive dhe ceremonive zyrtare.

Deputeti Amar Mecinović theksoi se simbolet shpesh përdoren në mënyrë të gabuar, fyese ose mungojnë fare aty ku ligji e kërkon.

Mecinović argumentoi se Ministria e Brendshme reagon vetëm ndaj dëmtimit të simboleve, por nuk ndërhyn në raste të tjera, si për shembull në zyra të kryetarëve të komunave ku mungon flamuri maqedonas.

Qëllimi i inspektoriatit është plotësimi i boshllëkut ligjor aktual, pasi sipas tij, ka një Ligj për përdorimin e flamurit dhe stemës shtetërore që 27 vjet, por pa një organ zbatues.

Inspektoriati, i cili do të funksionojë brenda Ministrisë së Drejtësisë, do të ketë kompetenca të qarta, procedura mbikëqyrëse dhe masa ndëshkimore.

Ai do të mbikëqyrë institucionet, personat juridikë dhe individët, si dhe do të pranojë iniciativa nga qytetarët.

Levica beson se projektligji do të marrë mbështetje të gjerë parlamentare, pasi fokusohet në rivendosjen e dinjitetit të simboleve shtetërore dhe forcimin e sigurisë ligjore.

Sipas Mecinović, simbolet shtetërore janë shprehje e sovranitetit, identitetit dhe kujtesës kolektive të qytetarëve.