Prokuroria Themelore Publike Shkup ka nisur procedurë hetimore kundër një personi të dyshuar për kryerjen e veprave penale – Dhunë sipas nenit 386 dhe Rrezikim i Sigurisë sipas nenit 144 të Kodit Penal.

Sipas hetimeve, i dyshuari më 5 maj ka rrezikuar sigurinë e bashkëshortes së tij duke e kërcënuar atë gjatë një konflikti verbal në sy të dy fëmijëve të tyre të mitur. Më pas, ai ka marrë një vazo dhe e ka gjuajtur drejt viktimës, por nuk e ka goditur atë, por murin. Viktima, e frikësuar për sigurinë e saj, menjëherë i ka marrë fëmijët dhe është larguar në shtëpinë e nënës së saj.

Më 7 maj, i dyshuari ka përdorur automjetin e tij për të bllokuar rrugën e një makine në të cilën po udhëtonte viktima me një person tjetër. Pas kësaj, ai ka filluar t’i ofendojë dhe kërcënojë ata, dhe më pas në mënyrë të përsëritur e ka goditur, shkelmuar dhe goditur automjetin me objekte. Këto veprime të dhunshme kanë shkaktuar ndjenjë pasigurie dhe frike tek viktimat.

Prokurori Publik i ka paraqitur gjyqtarit të procedurës paraprake propozim për caktimin e masave të sigurisë për të dyshuarin – ndalim të lëshimit të vendbanimit, detyrim për t’u paraqitur periodikisht tek një zyrtar i caktuar, konfiskim i përkohshëm i një dokumenti udhëtimi ose dokument tjetër për kalimin e kufirit shtetëror, domethënë ndalim i lëshimit të tij, ndalim i vizitës në një vend ose zonë të caktuar, si dhe ndalim i afrimit ose vendosjes, domethënë mbajtjes së kontakteve me viktimën.