Një aksident i rëndë trafiku ka ndodhur dje pasdite në fshatin Dobridoll të Gostivarit, ku një i mitur u lëndua rëndë.

Sipas informacioneve nga Stacioni Policor i Gostivarit, aksidenti ka ndodhur rreth orës 16:00.

Automjeti “Seat Leon” me targa të Gostivarit, i drejtuar nga B.K. (39 vjeç) nga fshati Dobridoll, ka goditur një fëmijë të vogël, gjithashtu nga i njëjti fshat.

I mituri ka marrë lëndime të rënda trupore, të cilat u konfirmuan në Spitalin e Përgjithshëm të Gostivarit.

Një ekip inspektimi nga Stacioni Policor i Gostivarit ka kryer ekspertizën në vendin e ngjarjes për të zbardhur rrethanat e plota të aksidentit.