Banka Kombëtare e Maqedonisë së Veriut ka menaxhuar me sukses një sërë goditjesh ekonomike, duke siguruar një ulje të inflacionit, një kurs të qëndrueshëm këmbimi dhe një sistem financiar të sigurt, sipas Fondit Monetar Ndërkombëtar (FMN). Ky konstatim u bë pas misionit të rregullt të konsultimit të Neni IV.

FMN vlerëson pozitivisht qasjen e kujdesshme dhe graduale të Bankës Kombëtare në lehtësimin e politikës monetare, duke u bazuar në kushtet dhe analizat ekonomike. Institucioni financiar ndërkombëtar thekson rëndësinë e ruajtjes së pavarësisë së bankës qendrore, si themel për stabilitetin e çmimeve, kursit të këmbimit dhe sistemit financiar.

FMN rekomandon që Banka Kombëtare të vazhdojë me politikën e kujdesshme monetare derisa të konfirmohet një rënie e qëndrueshme dhe e vazhdueshme e inflacionit. Nëse materializohen disa nga rreziqet e brendshme, FMN thekson se Banka Kombëtare duhet të jetë e gatshme të shtrëngojë sërish politikën monetare, duke përfshirë menaxhimin e likuiditetit me instrumente të disponueshme, siç është rezerva e detyrueshme.

Në fushën e stabilitetit financiar, FMN e vlerëson pozitivisht futjen e masave makroprudenciale si kufizimet e raportit kredi-vlerë dhe borxh-ardhura, të cilat tashmë po kontribuojnë në reduktimin e rreziqeve në tregun e pasurive të paluajtshme dhe mbrojtjen nga huamarrja e tepërt. Gjithashtu mbështetet rritja graduale e tamponit kapital kundërciklik për bankat dhe kërkesat shtesë të kapitalit, me qëllim rritjen e qëndrueshmërisë së sistemit bankar, dhe në përputhje me rregulloret evropiane.