Në Kumanovë ka shpërthyer një skandal i madh korruptiv urbanistik, ku kryetari i komunës, Maksim Dimitrievski, akuzohet për përfitime të paligjshme në bashkëpunim me këshilltarët e BDI-së. Sipas LSDM-së, Dimitrievski ka orkestruar një skemë korruptive përmes së cilës një i afërm i tij ka fituar 350,000 euro në pak ditë, duke shitur një pronë te kompania “Lidl”.

Atina Murgashanska, këshilltare e LSDM-së në Këshillin Komunal të Kumanovës, deklaroi në një konferencë për shtyp se Dimitrievski, me ndihmën e këshilltarëve të BDI-së, ka miratuar një Plan Detal Urbanistik (PDU) nga i cili ka përfituar financiarisht. Ajo theksoi se ky rast duhet të futet në librat e krimit të organizuar dhe korrupsionit.

Sipas LSDM-së, në gusht 2023, Komuna e Kumanovës ka shpallur një tender për shitjen e një parcele shtetërore në zonën industriale Reçicë, me qëllim blerjen nga “Lidl”. Dy muaj më vonë, një parcelë e familjes së Dimitrievskit është blerë nga i afërmi i tij, Dragan Mitevski, për 250,000 euro, e cila më pas është rishitur te “Lidl” për 600,000 euro.

Murgashanska theksoi se ky është një rast i qartë i korrupsionit, ku i afërmi i Dimitrievskit ka fituar 350,000 euro brenda pak ditësh pa asnjë investim apo rrezik. Ajo pyeti se si ka mundësi që “Lidl” ka përfunduar me pronën e familjes së Dimitrievskit dhe si është dyfishuar çmimi i tokës brenda pak ditësh.

LSDM kërkoi nga institucionet që të reagojnë menjëherë ndaj këtij skandali dhe të ngrenë padi penale për shpërdorim të detyrës zyrtare, tregti me ndikim dhe korrupsion të mundshme. Ata gjithashtu kërkuan një auditim nga Zyra Shtetërore e Auditimit të të gjithë procedurës për ndryshimin e PDU-së dhe një procedurë urgjente nga Komisioni Shtetëror për Parandalimin e Korrupsionit.