Shfuqizimi i nenit 62-a të Ligjit për Ndërtim nga ana e Qeverisë së Republikës së Maqedonisë së Veriut ka ngjallur shqetësime të mëdha lidhur me mbrojtjen e të drejtave të qytetarëve në procesin e ndërtimit. DOM thekson se kjo lëvizje nxjerr në pah rëndësinë e adresimit të reformave sistemike në vend të ndërhyrjeve të pjesshme.

Neni 62-a i jepte mundësinë qytetarëve të shprehnin mendimet e tyre lidhur me ndërtesat e reja që mund të ndikonin në jetën dhe pronën e tyre. Heqja e këtij neni ngre pikëpyetje mbi mënyrën se si do të mbrohen të drejtat e qytetarëve në të ardhmen.

DOM thekson se për një zhvillim të qëndrueshëm dhe të drejtë të industrisë së ndërtimit, nevojiten zgjidhje të thella dhe afatgjata, të përfshira në korniza ligjore gjithëpërfshirëse. Aktualisht, ekzistojnë tekste të gatshme projektligjesh për një Ligj të ri për Ndërtimin dhe një Ligj për Mbrojtjen e Trashëgimisë Kulturore, që ofrojnë mundësinë për të krijuar një kornizë të tillë.

DOM u bën thirrje Qeverisë dhe Kuvendit të Maqedonisë së Veriut të rishqyrtojnë qasjen e ndryshimeve të pjesshme dhe të përqendrohen në miratimin e një Ligji të ri për Ndërtimin dhe një Ligji për Mbrojtjen e Trashëgimisë Kulturore mbi një bazë të shëndoshë, duke përdorur tekstet ekzistuese të projektligjeve si pikënisje. Kërkohet një proces transparent dhe gjithëpërfshirës i përgatitjes dhe miratimit të këtyre ligjeve, në mënyrë që të krijohet një kornizë ligjore që do të mbrojë të drejtat e qytetarëve, do të sigurojë zhvillim të qëndrueshëm dhe do të promovojë sigurinë ligjore në fushën e ndërtimit. Gjithashtu, DOM kërkon që brenda kornizës së zgjidhjeve të reja ligjore, të sigurohen mekanizma për mbrojtjen e të drejtave të qytetarëve në lidhje me ndikimin e ndërtesave të reja.