Hetimet për zjarrin tragjik në diskotekën “Puls” në Koçan, ku humbën jetën 61 persona dhe u plagosën mbi 100 të tjerë, po zgjerohen me urdhërarrestin e shtatë oficerëve të policisë. Prokurori publik Ljupço Kocevski e konfirmoi lajmin në emisionin “Top Tema” në televizionin Telma.

Kocevski theksoi se prokuroria ka nisur hetimet për disa oficerë dhe një urdhërarrest është lëshuar për shtatë të tjerë, të cilët do të dalin para prokurorit publik dhe më pas para një gjyqtari të procedurës paraprake.

Sipas Kocevskit, diskoteka “Puls” ishte e njohur jo vetëm për policinë, por për të gjithë qytetin, vetëqeverisjen lokale dhe të gjitha institucionet kompetente që duhet të kishin funksionuar.

Ai gjithashtu vuri në dukje se në Koçan nuk ishte kryer asnjë inspektim i këtij objekti për 13 vjet. Kjo ngre pikëpyetje serioze mbi përgjegjësinë e institucioneve dhe neglizhencën e mundshme.