Një burrë është nën hetim nga Prokuroria e Shkupit për vrasjen e partneres së tij, me të cilën jetonte në bashkëjetesë. Sipas prokurorisë, ngjarja e rëndë ka ndodhur në shtëpinë e tyre në Shuto Orizari, ku ai i ka shkaktuar plagë me thikë në zonën e qafës dhe gjoksit, duke i shkaktuar vdekjen e menjëhershme.

Një person tjetër po hetohet gjithashtu për ndihmë ndaj autorit pas kryerjes së krimit. Prokuroria Themelore Publike Shkup ka lëshuar urdhër për kryerjen e procedurës hetimore ndaj një personi për shkak të dyshimit të bazuar se ka kryer veprën penale – Vrasje sipas nenit 123 paragrafi 2 pika 2 të Kodit Penal. Hetim është nisur edhe ndaj një personi tjetër për veprën penale – Ndihmë ndaj kryerësit pas kryerjes së krimit sipas nenit 365 paragrafi 3 i Kodit Penal.

Sipas Prokurorisë, i dyshuari i parë, dje, duke kryer dhunë në familje në shtëpinë e tyre në Shuto Orizari, i mori jetën partneres së tij me të cilën jetonte në bashkëjetesë. Ai e ka kryer aktin në prani të vajzës së tyre 5-vjeçare. Ai i ka shkaktuar plagë me thikë në zonën e qafës dhe gjoksit, nga të cilat ajo vdiq në vend.

Menjëherë pas kësaj, ai u largua nga shtëpia, gjë që u ndihmua nga i dyshuari i dytë, i cili i dha rroba të tjera dhe i siguroi transport me makinë deri në vendkalimin kufitar të Tabanocit. Ai e la pranë kufirit dhe u kthye në Shkup ku u përpoq të mbulonte gjurmët e veprimeve të tij ndihmëse. I dyshuari për vrasjen vazhdoi drejt kufirit ku u ndalua dhe u arrestua.

Prokuroria thekson se gjatë ditës, me urdhër të një prokurori publik, janë ndërmarrë disa veprime, të cilat kanë rezultuar në gjetjen e armës me të cilën është kryer vrasja, rrobat e kryerësit dhe prova të tjera materiale që ai është përpjekur t’i fshehë dhe që do t’i nënshtrohen ekspertizës.

Prokurori publik u ka paraqitur propozime gjyqtarit të procedurës paraprake nga Gjykata Themelore Penale Shkup për të caktuar një masë paraburgimi për të dy, si për të dyshuarin për vrasje ashtu edhe për bashkëpunëtorin e tij.