Komisioni Disiplinor i Federatës së Futbollit të Maqedonisë (FFM) ka marrë vendime të rënda ndëshkimore ndaj FC Gostivar, pas incidentit në ndeshjen kundër Rabotnicki.

Klubi është dënuar me heqje të 9 pikëve, duke rënë në vendin e pestë në tabelë me 39 pikë.

Përveç kësaj, presidenti i klubit, Enes Usta, kapiteni Alper Potuk, dhe trajneri Blazo Panov janë pezulluar nga çdo funksion në futboll për dy vjet.

Arsyeja e këtyre dënimeve është braktisja e fushës nga lojtarët e Gostivarit në minutën e 85-të të ndeshjes, me rezultatin 1:2 në favor të Rabotnicki.

Alper Potuk është dënuar me dy vjet pezullim për nxitjen e lojtarëve të largohen nga fusha.

FC Gostivar u gjobit gjithashtu me 2,500 euro për braktisjen e fushës dhe 5,000 euro për organizim të dobët dhe praninë e personave të paautorizuar në ambientet zyrtare të fushës.

Një tjetër dënim i rëndë është ndalesa e luajtjes së 10 ndeshjeve në fushën e tyre si vendas, duke u detyruar të luajnë 100 kilometra larg fushës së tyre zyrtare.

Të gjithë lojtarët e Gostivarit që ishin në protokollin e ndeshjes kundër Rabotnicki u gjobitën me 500 euro secili për braktisjen e ndeshjes.