Një zjarr i madh shpërtheu në një impiant riciklimi të baterive dhe mbetjeve elektronike në Trubarevë, duke shkaktuar shqetësime të mëdha për shkak të përhapjes së substancave të dëmshme në ajër. Ministri i Mjedisit dhe Planifikimit Hapësinor, Izet Mexhiti, raportoi vonë mbrëmë nga vendi i ngjarjes dhe siguroi qytetarët se situata është nën kontroll.

Sipas ministrit Mexhiti, kompania posedon një leje 10-vjeçare të marrë në vitin 2021. Ai u bëri thirrje qytetarëve për qetësi dhe besim në institucionet, duke theksuar se autoritetet kanë reaguar menjëherë dhe inspektorët kanë matur cilësinë e ajrit. Rezultatet e para të matjeve priten të publikohen së shpejti, megjithatë, ato nuk janë bërë ende publike.

Ministri Mexhiti arriti në Trubarevë vonë në mbrëmje. Interesant është fakti se gjatë pasdites, ai ishte i angazhuar në aktivitete partiake, duke munguar në konferencën e jashtëzakonshme të qeverisë për zjarrin. Gjatë ditës, gazetarët ishin në kërkim të tij për shkak të urgjencës së situatës. Mexhiti ishte shfaqur disa herë drejtpërdrejt në rrjetet sociale nga aktivitetet partiake, ku ai është kandidat për kryetar të komunës së Çairit.