Shkup, Maqedoni e Veriut – Republika e Maqedonisë së Veriut dhe Shtetet e Bashkuara të Amerikës po festojnë 30 vjetorin e vendosjes së marrëdhënieve diplomatike. Një ceremoni qendrore u zhvillua në Klubim e Deputetëve në Shkup, ku morën pjesë zyrtarë të lartë nga të dy vendet.
Ministri i Punëve të Jashtme dhe Tregtisë së Jashtme, Timço Mucunski, theksoi se kjo shënon tre dekada partneriteti që e ka ndihmuar popullin maqedonas të bëhet më i fortë, më i lirë dhe më i suksesshëm. Ai vuri në dukje mbështetjen e Shteteve të Bashkuara që nga ditët e para të pavarësisë së vendit, duke përmendur veçanërisht vendimin e vitit 2004 për të njohur emrin kushtetues të vendit. Ministri gjithashtu theksoi bashkëpunimin në fushën e mbrojtjes dhe kontributin ndaj stabilitetit dhe sigurisë, duke shtuar se vendi është krenar për bashkëpunimin e shkëlqyer të ushtrisë me Gardën Kombëtare të Vermontit, si dhe pjesëmarrjen në misione ndërkombëtare dhe në Koalicionin Global kundër Terrorizmit.
Ambasadorja e Shteteve të Bashkuara të Amerikës, Angela Ageler, kujtoi se Shtetet e Bashkuara dhe Republika e Maqedonisë së Veriut e formalizuan partneritetin e tyre tre dekada më parë, bazuar në besimin dhe respektin e ndërsjellë për vlerat demokratike. Ajo shprehu besimin se në 30 vitet e ardhshme, të dy vendet do të vazhdojnë të punojnë së bashku për të thelluar këtë partneritet të vlefshëm, duke zgjeruar lidhjet tregtare, luftuar korrupsionin, modernizuar bashkëpunimin e mbrojtjes, inkurajuar transformimin dixhital dhe duke vazhduar ndërtimin e infrastrukturës energjetike që siguron pavarësi dhe rritje.
Në ceremoni morën pjesë Presidentja Gordana Siljanovska – Davkova, Kryeministri Hristijan Mickoski, ministra nga Qeveria, përfaqësues të trupit diplomatik dhe figura të shquara publike nga sfera të ndryshme, të cilët kanë dhënë një kontribut të rëndësishëm në zhvillimin e partneritetit dhe bashkëpunimit midis dy vendeve në 30 vitet e fundit.
Partneriteti strategjik midis dy vendeve u institucionalizua me Deklaratën për Partneritet Strategjik nga viti 2008, dhe në vitin 2022 në Uashington u avancua me krijimin e Dialogut Strategjik – një mekanizëm që hap rrugën për bashkëpunim më të thellë në siguri, ekonomi, energji dhe arsim.