Ministri i Punëve të Brendshme, Pançe Toshkovski, vizitoi sot Departamentin e Punëve të Brendshme Strugë dhe Stacionin Policor për Kontrollin e Kufirit Qafë Thanë. Vizita kishte si qëllim informimin nga afër për situatën e sigurisë dhe masat e ndërmarra në prag të zgjedhjeve lokale dhe sezonit turistik.

Gjatë vizitës në Strugë, Toshkovski u njoh nga udhëheqësia e SPB Ohër dhe DPB Strugë me gjendjen e sigurisë në rajon. U theksuan rezultate të dukshme në luftimin e krimit të dhunshëm dhe progres në përmirësimin e sigurisë rrugore, ku do të vazhdohet investimi i përpjekjeve shtesë.

Ministri Toshkovski theksoi se po ndërmerren aktivitete operacionale për të siguruar një proces zgjedhor paqësor dhe të sigurt në pritje të zgjedhjeve lokale. Ai siguroi qytetarët se institucionet po punojnë për të garantuar një klimë të qetë gjatë votimit.

Lidhur me kalimin kufitar të Qafë Thanës, u konstatua një rritje e numrit të udhëtarëve gjatë këtij sezoni veror krahasuar me periudhën e njëjtë të vitit të kaluar. Ministri njoftoi se po punohet me kolegët shqiptarë për zbatimin e sistemit “One Stop”, i cili, së bashku me rregullimet infrastrukturore, do të mundësojë një zgjidhje të përhershme për të zvogëluar bllokimet dhe për të përshpejtuar rrjedhën e udhëtarëve dhe automjeteve gjatë sezonit turistik.