Shtip, Maqedoni e Veriut – Tre persona kanë humbur jetën dhe dy të tjerë janë lënduar, përfshirë shoferin, në një aksident të rëndë që ndodhi sot në autostradën Shtip-Radovish.

Sipas informacioneve nga Ministria e Punëve të Brendshme, aksidenti ka ndodhur rreth orës 08:13 të mëngjesit. Një kamion “Fiat Ducato” me targa të Strumicës, në pronësi të një subjekti juridik nga Strumica dhe i drejtuar nga M.D.(35) nga fshati Ilovicë, Strumicë, ka dalë nga rruga dhe ka rënë nga ura në lumin Baltaliska, afër fshatit Lakavicë, në rajonin e Shtipit.

Ekipi mjekësor i urgjencës ka konstatuar vdekjen e tre burrave në vendngjarje. Ndërkohë, shoferi dhe një person tjetër i lënduar janë transportuar menjëherë në Spitalin Klinik të Shtipit për të marrë ndihmën e nevojshme mjekësore.

Autoritetet policore kanë filluar menjëherë hetimet për zbardhjen e plotë të rrethanave që çuan në këtë tragjedi. Detaje të tjera pritet të bëhen të ditura pas përfundimit të hetimeve.