Shkup – Departamenti për Luftën kundër Krimit të Organizuar dhe Serioz – Sektori për Hetimet Kriminale – Njësia për Trafikimin e Paligjshëm të Drogave, ka ngritur kallëzim penal në Prokurorinë Themelore Publike Shkup kundër B.A.(42) dhe B.A.(40), të dy nga Shkupi, për shkak të dyshimit të bazuar se kanë kryer veprën penale “prodhim i paautorizuar dhe shpërndarje e narkotikëve, substancave psikotrope dhe prekursorëve”.

Sipas hetimeve, të akuzuarit, në periudhën nga viti 2020 deri në vitin 2025, kanë siguruar fara të bimës kanabis dhe kanë kultivuar kërcell në oborret e shtëpive të tyre në fshatin Ognjancë të Shkupit.

Më pas, ata e kanë korrur, tharë dhe paketuar në qese me zinxhir, të cilat më pas i kanë shitur përdoruesve në zonën e Shkupit me një çmim prej 500 denarësh për qese.

Më datë 06.09.2025, me urdhër të gjykatës, oficerët e policisë kanë kryer kontrolle në shtëpitë e të pandehurve.

Gjatë kontrollit, në shtëpinë dhe oborrin e B.A.(42) janë gjetur dhe sekuestruar marijuanë dhe tetë kërcell të bimës kanabis.

Ndërkohë, në shtëpinë dhe oborrin e B.A.(40) janë gjetur dhe sekuestruar marijuanë, amfetaminë, një grirëse dhe katër kërcell të bimës kanabis.