Shkup – Ministri i Shëndetësisë, Azir Aliu, dhe Kryeministri Hristijan Mickoski, vizituan sot punimet e rindërtimit dhe adaptimit të bllokut operativ dhe njësisë së kujdesit intensiv në Spitalin e Përgjithshëm “8 Shtatori” në Shkup.

Investimi prej 12 milionë eurosh përfshin 750 metra katrorë salla operacioni dhe 500 metra katrorë laboratorë me teknologjitë më të fundit. Sipas Aliu, kjo do të përmirësojë shërbimet shëndetësore për qytetarët.

Në kuadër të këtij investimi, parashikohen shtatë salla të reja operacioni, duke përfshirë një sallë për kirurgji robotike, e para e këtij lloji në vend. Dy salla do të jenë për kirurgji abdominale, dy për intervenime urologjike, dy për vesh, hundë dhe fyt, dhe një për kirurgji të syrit.

Projekti gjithashtu parasheh pajisje të reja me kushtet më moderne spitalore për pacientët dhe punonjësit shëndetësorë, dhe do të rinovohet plotësisht çatia e spitalit.

Njësia e kujdesit intensiv, me një sipërfaqe prej 500 metra katrorë, do të ketë shtatë bokse të pajisura plotësisht për pacientët, të rreshtuara në mënyrë lineare me monitorim qendror nga personeli mjekësor. Gjithashtu, do të ketë një laborator biokimik, një laborator mikrobiologjik dhe një laborator patologjik.

Aliu theksoi se ky investim do të rrisë ndjeshëm nivelin e ofrimit të kujdesit shëndetësor, në kushtet më moderne sipas standardeve më të fundit evropiane dhe botërore. Ai shtoi se ky investim është pjesë e një “bumi investimesh” në infrastrukturë, teknologji dhe burime njerëzore në sektorin e shëndetësisë.