Shkup – Me ngrohjen e motit dhe rritjen e bimësisë, lëvizja e gjarpërinjve shtohet, gjë që në disa raste mund të çojë në shfaqjen e tyre të rastësishme në mjedise urbane. Takimet e rralla të mundshme me këto kafshë mund të ngrenë pyetje për qytetarët në lidhje me sigurinë e tyre dhe atë të kafshëve të tyre shtëpiake.

Shoqata Ekologjike Maqedonase (SHEM) këshillon qytetarët të ruajnë qetësinë, të jenë të kujdesshëm dhe të shmangin kontaktin e drejtpërdrejtë me këto kafshë, pavarësisht faktit se shumica e gjarpërinjve në Maqedoni nuk janë të rrezikshëm.

SHEM informon se në territorin e vendit jetojnë 16 lloje gjarpërinjsh, nga të cilët vetëm tre janë helmues. Më i përhapuri, dhe për rrjedhojë më i rrezikshmi, është nepërka me bri (poskok), e cila njihet nga “briri” karakteristik në pjesën e përparme të kokës dhe modelet romboide që shtrihen përgjatë shpinës. Dy llojet e tjera të nepërkave – sharka dhe lutica e stepave – jetojnë në një lartësi mbi 1500 metra dhe në disa male në vend.

Në rast të pickimit nga gjarpri, qytetarët duhet të ruajnë qetësinë dhe të kërkojnë menjëherë ndihmë mjekësore. Nëse qytetarët nuk kanë probleme shëndetësore para-ekzistuese dhe me ndihmë mjekësore në kohë, pickimi do të kalojë pa komplikime më serioze për shëndetin e tyre.

Sipas Dragan Arsovskit, Doktor i Shkencave Biologjike i specializuar në gjarpërinjtë dhe zvarranikët e tjerë në Shoqatën Ekologjike Maqedonase, në Maqedoni, nuk ka gjarpërinj që mund të sulmojnë në mënyrë agresive një person në mbrojtje të territorit ose një foleje. Çdo takim i afërt ose pickim ndodh për shkak të mungesës së vëmendjes ose mos mbajtjes së pajisjeve të duhura ( çizme të larta) në natyrë. Gjarpri gjithmonë përpiqet të shmangë një takim me një person dhe më shpesh ikën ose ngrihet në vend – gjithçka që duhet të bëjmë është ta anashkalojmë ose ta lëmë të vazhdojë rrugën e tij.

SHEM u bën thirrje qytetarëve të mos sulmojnë dhe dëmtojnë gjarpërinjtë, të cilët janë me rëndësi jashtëzakonisht të madhe në ruajtjen e ekuilibrit të brishtë të ekosistemit dhe kontrollin e popullatave të brejtësve dhe llojeve të tjera të gjarpërinjve. Gjithashtu, SHEM kujton se nuk ka shërbim për largimin e këtyre kafshëve në Maqedoni dhe qytetarët duhet të mirëmbajnë siç duhet dhe rregullisht sipërfaqet e oborreve të tyre si një masë parandaluese kundër strehimit të gjarpërinjve.