Presidenti i LSDM-së, Venko Filipçe, akuzoi Hristijan Mickoskin se po përfiton nga një gjyqësor partiak dhe se qytetarët e kanë kuptuar këtë. Ai theksoi se Mickoski nuk ka vullnet për të reformuar sistemin gjyqësor.

Filipçe deklaroi se Mickoski vazhdimisht përmend prokurorë dhe gjyqtarë, duke i kërcënuar publikisht me shkarkim dhe zëvendësim, por nuk ndërmerr asnjë veprim thelbësor për reformimin e gjyqësorit. Ai e quajti qeverinë e VMRO-DPMNE-së si një forcë që po e kthen vendin prapa, në izolim, kaos dhe frikë.

Sipas Filipçes, qeveria aktuale nuk ka vizion, nuk ofron të ardhme dhe po e partizon çdo sistem, duke abuzuar me institucionet dhe duke harruar qytetarët. Ai shtoi se Maqedonia nuk mbrohet me slogane dhe ofendime, por me rezultate, institucione të forta dhe një qeveri të ndershme.

Filipçe e cilësoi “patriotizmin” e Mickoskit me britma, ofendime, ndarje të popullit dhe nacionalizëm si të padobishëm për shtetin dhe qytetarët. Ai theksoi se LSDM duhet të bëhet sërish zëri i arsyes, i popullit dhe i së ardhmes, për ta kthyer shtetin në duart e qytetarëve.