Ka filluar ndërtimi i kopshtit të tretë të ri në komunën e Gazi Babës, njoftoi kryetari aktual dhe kandidati për një mandat të ri, Boban Stefkovski. Kopshti i ri do të jetë i vendosur mes lagjeve Maxhari dhe Keramidnicë.

Kopshti do të ketë një sipërfaqe prej 1360 metrash katrorë dhe një kapacitet për 150 fëmijë. Vlera e investimit është 147,000,000 denarë, fonde të siguruara nga Qeveria.

Sipas Stefkovskit, ky është kopshti i tretë i ri që po ndërtohet në këtë komunë gjatë një mandati të vetëm. Ai shtoi se pas kopshteve në Trubarëvë dhe Inxhikovë, ky është një hap tjetër drejt përmirësimit të kushteve për fëmijët.

Stefkovski njoftoi gjithashtu se planet për mandatin e ardhshëm përfshijnë ndërtimin e kopshteve të reja në Hipodrom 2, Keramidnicë dhe Singeliç. Ai e bëri këtë njoftim në profilin e tij në “Facebook”.