Forumi i 14-të Ndërkombëtar i Energjisë për Zhvillim të Qëndrueshëm (IFESD-14) përfundoi në Shkup, duke shënuar një epokë të re për bashkëpunimin rajonal dhe global në fushën e energjisë. Me nënshkrimin e “Deklaratës së Shkupit,” forumi tre-ditor e shndërroi Shkupin në një qendër globale për dialogun energjetik dhe vizionet e së ardhmes.

Mbi 500 pjesëmarrës nga më shumë se 70 shtete dhe mbi 150 folës morën pjesë në forum, duke prezantuar ide, zgjidhje dhe hapa konkretë për të ardhmen e tranzicionit energjetik global përmes 35 sesioneve tematike dhe paneleve.

Ministrja e Energjisë, Minierave dhe Burimeve Minerale, Sanja Bozinovska, theksoi se “Deklarata e Shkupit” është një mesazh i fortë që rajoni nuk është vetëm ndjekës i tranzicionit global, por një shtytës aktiv i tij. “Jam krenare që një impuls i ri për bashkëpunimin, solidaritetin dhe vizionin energjetik fillon nga Shkupi, nga zemra e Ballkanit,” tha Bozinovska.

Deklarata thekson rëndësinë e lidhjes rajonale, investimeve të zgjuara, transformimit dixhital dhe një tranzicioni energjetik gjithëpërfshirës që nuk lë askënd pas.

Armen Grigoryan, Përfaqësuesi Rezident i Programit të Kombeve të Bashkuara për Zhvillim (UNDP), theksoi se rruga drejt energjisë së qëndrueshme, të sigurt dhe të përballueshme është e qartë, por kërkon bashkëpunim dhe vizion. Ai shtoi se UNDP është e kënaqur të punojë me Qeverinë dhe Ministrinë e Energjisë, Minierave dhe Burimeve Minerale, si dhe me komisionet rajonale të OKB-së, në hartimin e politikave dhe zgjidhjeve për reduktimin e emetimeve, përfshirjen dhe përmirësimin e cilësisë së ajrit.

Dario Liguti, Drejtor i Divizionit të Energjisë të UNECE, deklaroi se “Deklarata e Shkupit” përfaqëson një sinjal të fortë për bashkëpunimin dhe ambicien rajonale dhe globale. Ai riafirmoi angazhimin e përbashkët për të përshpejtuar një tranzicion energjetik të drejtë dhe gjithëpërfshirës, i cili sjell përparim real për njerëzit, planetin dhe prosperitetin.

Nënshkruesit e deklaratës ranë dakord të punojnë në:

• Politika energjetike të integruara dhe gjithëpërfshirëse,
• Modernizimin e rrjeteve të energjisë elektrike dhe dixhitalizimin,
• Investimet në burime të rinovueshme dhe një tranzicion të drejtë,
• Promovimin e financave të gjelbra dhe barazisë gjinore në energji.

Forumi IFESD-14 u organizua nga Ministria e Energjisë, Minierave dhe Burimeve Minerale e Republikës së Maqedonisë së Veriut, Programi i Kombeve të Bashkuara për Zhvillim (UNDP) dhe pesë komisionet rajonale ekonomike të OKB-së.